Statut Nazzjonali O.F.S.

STATUTI PARTIKULARI
TAL-FRATERNITA’ NAZZJONALI
TA’ MALTA
TA’ L-ORDNI FRANĠISKAN SEKULAR


Redazzjoni finali
Koretta bis-suġġerimenti
Tal-Ministru Ġenerali Emanuela De Nunzio OFS
u ta’ l-Assistent Ġenerali P. Valentin Redondo OFMCon,
riveduta mill-Eżekuttiv tal-Kunsill Nazzjonali,
bil-konsultazzjoni mal-Fraternitajiet Lokali,
u mressqa għall-approvazzjoni definittiva
u għall-konferma tal-Ministru Ġeneral
u tal-Kunsill tal-Presidenza OFS

PRO MANUSCRIPTO

Kunsill Nazzjonali OFS
Malta 2000




STATUTI PARTIKULARI TAL-FRATERNITÀ NAZZJONALI TA’ MALTA TA’ L-ORDNI FRANĠISKAN SEKULARINTRODUZZJONI .

L-Ordni Franġiskan Sekular fil-gżejjer Maltin ilu jeżisti minn kemm ilhom preżenti l-aħwa ta’ l-Ewwel Ordni Franġiskan. Il-Fraternitajiet antiki tat-Terz’Ordni kienu twaqqfu fil­kunventi Franġiskani kollha u f’ħafna parroċċi tal-kleru djoċesan. Illum il-ġurnata, il­Fraternitajiet Lokali tal-Franġiskani Sekulari f’Malta, imwaqqfin mill-Ewwel Ordni, u li jgħixu skond ir-Regola ta’ Pawlu VI, huma dawn li ġejjin:

1. Fraternità ta’ S. Franġisk (Birkirkara)

2. Fraternità tas-Salib Imqaddes (Floriana)

- Fraternità ta’ S. Antnin ta’ Padova (Għajnsielem - Gozo) (Qed tiġi ffurmata)

3. Fraternità ta’ S. Franġisk (Ħamrun)

4. Fraternità ta’ S. Liberata (Kalkara)

5. Flaternità tat-Trinità Qaddisa (Marsa)

6. Fraternità tal-Verġni Marija Reġina (Marsa)

- Fraternità ta’ San Ġużepp (Msida) (Qed tiġi ffurmata)

7. Fraternità ta’ S. Antnin ta’ Padova (Paola)

- Fraternità ta’ S. Franġisk (Rabat)

8. Fraternità ta’ S. Marija ta’ Ġesù (Rabat)

9. Fraternità tal-Verġni Marija ta’ Lourdes (San Ġwann)

- Fraternità ta’ S. Franġisk (S. Pawl il-Baħar - Qawra - Burmarrad)

- Fraternità tal-Verġni Marija tal-Qalb ta’ Gesù (Sliema)

- Fraternità ta’ S. Franġisk (Valletta) (Qed tiġi ffurmata)

- Fraternità ta’ S. Marija ta’ Ġesù (Valletta) (Qed tiġi ffurmata)

- Fraternità ta’ S. Franġisk (Victoria - Gozo)

10. Fraternità tal-Verġni Marija tal-Grazzji (Victoria - Gozo)

IL-FRATERNITÀ NAZZJONALI TA’ MALTA

Artiklu 1. Kostituzzjoni tal-Fraternità Nazzjonali

1. Il-Fraternità Nazzjonali ta’ l-Ordni Franġiskan Sekular (OFS) ta’ Malta hi persuna ġuridika pubblika rikonoxxuta mill-Konferenza Episkopali ta’ Malta. L-istatus ċivili tagħha fir-Repubblika ta’ Malta hu dak ta’ assoċjazzjoni pubblika tal-Knisja Kattolika.

2. L-OFS ta’ Malta hu magħmul minn Fraternità Nazzjonali maqsuma fi Fraternitajiet Lokali (Kostituzzjonijiet Ġenerali OFS 1§5 = KK.ĠĠ. 1§5).

3. L-animazzjoni u t-tmexxija tal-Fraternità Nazzjonali hi l-kompetenza tal-Kunsill Nazzjonali flimkien mal-Ministru Nazzjonali, li jiġu eletti skond il-leġislazzjoni ta’ l-OFS.

4. Il-Fraternità Nazzjonali hi organizzata fi qbil mal-Liġi Kanonika, mar-Regola OFS, mal-Kostituzzjonijiet Ġenerali, ma’ l-Istatuti Ġenerali u Partikulari, u mar-Ritwal.

5. Il-Fraternità Nazzjonali ta’ Malta hi immexxija minn dawn l-Istatuti, li jiġu approvati u emendati matul il-Kapitlu Elettiv Nazzjonali (KK.ĠĠ. 65§3).

6. Il-Fraternità Nazzjonali għandha s-sede uffiċjali tagħha f’dan l-indirizz: Ordni Franġiskan SekularKunsill NazzjonaliC/O Kunvent tal-KapuċċiniTriq l-Isqof FX. FenechFloriana VLT 14 - Malta (KK.ĠĠ. 65§3).

7. Il-Fraternità Nazzjonali ta’ Malta tagħmel parti mill-grupp ta’ lingwa Ingliża ta’ l­OFS. Id-dokumentazzjoni uffiċjali tagħha tiġi ippubblikata bl-Ingliż u l-Malti.

Artiklu 2. Tmexxija tal-Fraternità Nazzjonali:-Il-Fraternità Nazzjonali hi immexxija mill-Kunsill Nazzjonali u mill-Eżekuttiv Nazzjonali. Il-Kunsill Nazzjonali hu magħmul mill-Eżekuttiv Nazzjonali, mill-Ministri tal­Fraternitajiet Lokali, u mill-Konferenza ta’ l-Assistenti Nazzjonali. L-Eżekuttiv Nazzjonali hu magħmul mill-Ministru Nazzjonali, Viċi Ministru Nazzjonali, Segretarju Nazzjonali, Ekonomu Nazzjonali, Direttur tal-Formazjoni, Kunsillier Internazzjonali, tliet Kunsillieri eletti, u l-Konferenza ta’ l-Assistenti Nazzjonali.

Artiklu 3. II-Kunsill Nazzjonali

1. Il-Kunsill Nazzjonali għandu qawwiet leġislattivi, deliberattivi u elettivi fil-limiti tal-konfini nazzjonali tiegħu u fi qbil mar-Regola u l-Kostituzzjonijiet OFS.

2. Il-Kunsill Nazzjonali jiltaqa’ għall-elezzjonijiet darba kull tliet snin. Il-Ministru Nazzjonali jsejjaħ ukoll il-Kunsill Nazzjonali għal-laqgħa almenu darbtejn fis-sena, b’avviż li jingħata xahar qabel.

3. Il-Kunsill Nazzjonali għandu dawn id-dmirijiet:

a. Li jġib ‘il quddiem l-ispiritwalità ta’ l-OFS f’Malta;

b. Li jipprepara l-Kapitlu Nazzjonali Elettiv;

c. Li jeleġġi r-rappreżentant nazzjonali u d-delegat li jissostitwih fil-Kunsill Internazzjonali;

d. Li jiffissa budget annwali, li jinkludi l-kontribuzzjoni annwali lill-Kunsill Internazzjonali ta’ l-Ordni Franġiskan Sekular;

e. Li jiffissa l-ammont ta’ għajnuna finanzjarja li l-Fraternitajiet Lokali jikkontribwixxu lill-Kunsill Nazzjonali.Artiklu

4. L-Eżekuttiv Nazzjonali

1. L-Eżekuttiv Nazzjonali jiġi elett matul il-Kapitlu Nazzjonali Elettiv. Il-membri kollha ta’ l-Eżekuttiv Nazzjonali għandhom dritt għall-vot.

2. Il-Ministru Nazzjonali jsejjaħ lill-Eżekuttiv Nazzjonali almenu sitt darbiet fis-sena, b’avviż li jingħata gimgħatejn qabel.

3. Id-dmirijiet ta’ l-Eżekuttiv Nazzjonali huma:a. Li janima u jmexxi lill-OFS fuq livell nazzjonali.b. Li jorganizza irtiri, laqgħat, seminars, ġranet ta’ studju, missjonijiet popolari, pubblikazzjonijiet u apostolat tal-medja, biex iġib ’il quddiem l-OFS f’Malta (KK.ĠĠ. 68§2

Artiklu 5. Dmirijiet ta’ l-Uffiċjali ta’ l-Eżekuttiv Nazzjonali

1. Il-Ministru Nazzjonali:

a. Isejjaħ u jippresjiedi l-laqgħat tal-Kunsill Nazzjonali u ta’ l-Eżekuttiv Nazzjonali;

b. Jaġixxi bħala r-rappreżentant legali ta’ l-OFS quddiem l-awtoritajiet ċivili u ekkleżjastiċi;

c. Jagħmel il-Viżta Fraterna tal-Fraternitajiet Lokali personalment jew permezz ta’ delegat;

d. Jibgħat rapport annwali tal-ħidma mwettqa mill-Kunsill Nazzjonali lill­Presidenza tal-Kunsill Internazzjonali (CIOFS);

e. Jagħti relazzjoni dwar l-OFS kull meta jiġi msejjaħ biex jagħmel dan matul il­Kapitli Provinċjali tal-Familji ta’ l-Ewwel Ordni Franġiskan;

f. Jiffirma d-dokumenti uffiċjali kollha tal-Kunsill Nazzjonali u jiffirma flimkien ma’ l-Ekonomu l-kontijiet fil-banek li jkollha l-Fraternità Nazzjonali;

g. Jitlob il-Viżta Fraterna mill-CIOFS u l-Viżta Pastorali mill-Konferenza Ġenerali ta’ l-Assistenti OFS;

h. Jikkura r-relazzjonijiet bejn il-CIOFS u l-Fraternità Nazzjonali, permezz tal­Kunsillier Internazzjonali.

2. Il-Viċi Ministru Nazzjonali:

a. Jidhol flok il-Ministru Nazzjonali kull darba li jku impedit leġittimament;

b. F’każ ta’ uffiċċju vakanti tal-Ministru Nazzjonali, il-Viċi Ministru Nazzjonali jidhol floku skond dak li jingħad fil-KK.ĠĠ. 81 § 1.

3. Is-Segretarju Nazzjonali:

a. Iżomm fl-ordni d-dokumentazzjoni kollha relattiva għall-Kunsill Nazzjonali u għall-Eżekuttiv Nazzjonali;

b. Jikteb u jqassam il-minuti tal-laqgħat tal-Kunsill Nazzjonali u ta’ l-Eżekuttiv Nazzjonali;

c. Javża lill-membri kollha minn qabel dwar il-laqħat;

d. Jieħu ħsieb ta’ l-arkivji tal-Fratemità Nazzjonali;

e. Jifformula kronaka dwar il-ġrajjiet ewlenin tal-Fratemità Nazzjonali OFS f’Malta.

4. L-Ekonomu Nazzjonali:

a. Iżomm akkont tal-flus u proprjetà tal-Fratemità Nazzjonali u jagħti rendikont lill-Kunsill Nazzjonali u lill-Eżekuttiv Nazzjonali;

b. Jamministra l-fondi tal-Fraternità Nazzjonali, taħt it-tmexxija tal-Ministru Nazzjonali, li miegħu hu jiffirma l-kontijiet kollha fil-bank;

c. Iżomm fl-ordni l-kotba ta’ l-amministrazzjoni tal-Fraternità Nazzjonali;d. Jagħti rapport finanzjarju annwali u l-budget għas-sena li tkun ġejja lill-CIOFS u lill-Kunsill Nazzjonali, jekk hemm bżonn, bl-għajnuna ta’ accountant kwalifikat.

5. Id-Direttur tal-Formazzjoni Inizjali u Permanenti:

a. Jikkoordina l-pjan ta’ Formazzjoni Inizjali u Permanenti fuq livell nazzjonali;

b. Jiġi megħjun minn équipe ta’ kollaboraturi għall-formazzjoni fuq livell nazzjonali, li jkun magħmul minn wiehed mill-Assisenti Nazzjonali flimkien ma’ żewġ Franġiskani Sekulari professi li jaħdmu bħala Animaturi u jkunu rċevew preparazzjoni xierqa fil-formazzjoni;

c. Jagħmel viżta annwali fil-Fratemitajiet Lokali kollha biex jivverifika l-pjan ta’ Formazzjoni Inizjali u Permanenti u l-fedeltà tal-Kunsill Lokali fl-applikazzjoni serja tal kriterji għad-dħul u l-professjoni tal-kandidati.

6. Il-Kunsillier Internazzjonali- Il-kompetenzi tal-Kunsillier Internazzjonali jinsabu fl-Istatuti tal-Fratemità Internazzjonali OFS, Artikli 22 - 24.

Artiklu 6: Kontroll tal-Proprjetà tal-Fraternità Nazzjonali OFS ta’ Malta:- Il-kotba ta’ l-amministrazzjoni u l-kontijiet tal-bank tal-Fraternitajiet Nazzjonali u Lokali jiġu miftuħin b’ordni tal-Ministru Nazzjonali jew tal-Kunsill Nazzjonali, kif ukoll matul il-Viżta Fraterna mir-rappreżentanti tal-CIOFS. Jekk il-Fraternità Nazzjonali ma tibqax teżisti, dak kollu li għandha rigward flus jew proprjetà jiġi amministrat mill­Presidenza tal-Kunsill Internazzjonali OFS f’Ruma. F’każ li ma tibqax teżisti Fraternità Lokali, dak kollu li għandha rigward flus jew proprjetà jaqa’ taħt l-amministrazzjoni tal­Kunsill Nazzjonali OFS ta’ Malta (“obveniunt personae iuridicae immediate superiori”, Codex Iuris Canonici, can. 123).

Artiklu 7: Quorum u Maġġoranza Assoluta waqt il-Proċeduri ta’ Votazzjoni

1. Il-Kunsill Nazzjonali u l-Eżekuttiv Nazzjonali ma jistgħux jiltaqgħu jekk ma jkunx hemm quorum preżenti. Il-quorum jikkonsisti fil-maġġoranza assoluta (wieħed fuq in-nofs) tan-numru tal-persuni li obbligati jidħlu għal-laqgħa.

2. Kull meta titressaq votazzjoni fil-Kapitlu Nazzjonali Elettiv, jew fil-Kunsill Nazzjonali jew fl-Eżekuttiv Nazzjonali, din trid iġġib maġġoranza assoluta biex torbot.

3. Il-votazzjoni normalment issir bil-wiri ta’ l-idejn. Votazzjoni sigrieta trid issir fil­każ ta’ elezzjonijiet, għad-dħul tal-kandidati, għall-professjoni, sospensjoni jew tkeċċija mill-Fraternità, jew kull meta xi membru jagħmel rikjesta espliċita.

Artiklu 8: Il-Kapitlu Elettiv tal-Fraternità Nazzjonali

1. Il-Kapitlu Nazzjonali Elettiv għandu jissejjaħ kull tliet snin, skond in-normi miktuba fil-KK.ĠĠ. 76-80. Il-membri “ex-officio” tal-Kapitlu huma dawk fil-Kunsill Nazzjonali, u t-tliet Assistenti Nazzjonali. Jintagħżel delegat minn kull Fraternità Lokali li jkollha sa 49 membru profess, u ieħor minn kull Fraternità Lokali li jkollha ’l fuq minn 50 membru profess. Kemm-il darba l-Ministru tal-Fraternità jkun jokkupa wkoll uffiċċju fl-Eżekuttiv Nazzjonali, jintagħżel delegat floku minn dik il-Fraternità. ld-delegati ma jidħlux fil­Kapitlu bħala rappreżentanti tal-Fraternitajiet Lokali, imma bħala delegati ta’ l-OFS f’Malta. Il-Franġiskani Sekulari kollha li jixtiequ, jistgħu jidħlu fil-post fejn jiġi iċċelebrat il-Kapitlu bħala osservaturi, mingħajr ma jindaħlu fil-proċeduri tal-Kapitlu (KK.ĠĠ. 77§2).

2. Il-Kunsill Nazzjonali jikkomunika d-data tal-Kapitlu Nazzjonali Elettiv lill-Ministru Ġeneral u lill-CIOFS sitt xhur qabel iċ-ċelebrazzjoni tiegħu, u jitlob President u Assistent xhud għall-elezzjonijiet.

3. Il-konvokazzjoni uffiċjali tal-Kapitlu Nazzjonali Elettiv trid tintbagħat lill­Franġiskani Sekulari kollha tliet xhur qabel. Id-dokument, iffirmat mill-Ministru Nazzjonali, jrid jindika l-post, id-data, il-ħin u l-aġenda tal-Kapitlu Nazzjonali Elettiv. Immedjatament wara għandha ssir l-għażla għad-delegati li jidħlu fil-Kapitlu.

4. Xahar qabel il-Kapitlu Nazzjonali Elettiv, tiġi ifformulata lista ta’ nominazzjonijiet mill-Kunsill Nazzjonali, u tintbagħat lid-delegati għall-Kapitlu. Tiġi ippreżentata skeda personali għal kull nomina. Persuna ma tistax tkun nominata għal aktar minn żewġ uffiċċji. Il-votanti fil-Kapitlu jibqgħu ħielsa li jivvutaw għal kull membru profess fl-Ordni Franġiskan Sekular.

5. Il-Kapitlu Nazzjonali Elettiv ma għandux jiġi limitat għall-elezzjonijiet. Hu opportunità unika għat-tiġdid ta’ l-OFS. Il-Ministru Nazzjonali jippreżenta relazzjoni dettaljata lill-Kapitlu. L-aġenda li tiġi ippreżentata qabel il-Kapitlu għandha tiġi segwita biex tiżgura effiċjenza u ordni. għandu jinħatar Moderatur għal kull sessjoni plenarja tal­Kapitlu, u dan għandu jiġi mħejji biex imexxi d-diskussjonijiet fil-Kapitlu. Il-ħatra ta’ Segretarju għall-Kapitlu u ta’ żewġ Skrutaturi għall-elezzjonijiet issir skond dak li jingħad fil-KK.ĠĠ. 76§4.

6. Il-minuti kollha, id-dokumentazzjoni rigward l-elezzjonijiet, u materjal dokumentarju ieħor tal-Kapitlu Nazzjonali Elettiv għandhom isiru f’verżjoni bl-Ingliż u oħra bil-Malti, li iffirmati mill-President, Assistent xhud, u Segretarju. Il-verżjoni bl-Ingliż tintbagħat lill-CIOFS f’Ruma, u kopja tagħha flimkien mal-verżjoni bil-Malti tinżamm fl­arkivji tal-Kunsill Nazzjonali.

7. Matul il-Kapitlu Nazzjonali Elettiv il-membri ta’ l-Eżekuttiv Nazzjonali li jispiċċa li ta’ dak li jidħol floku, wara l-elezzjonijiet, huma membri bi dritt tal-vot sa tmiem il-Kapitlu.

8. Iċ-ċelebrazzjonijiet matul il-Kapitlu għandhom isiru skond dak li hu preskritt fir­Ritwal.

9. Sitt xhur wara l-Kapitlu, il-Kunsill Nazzjonali ġdid jitlob lill-Ministru Ġeneral biex jagħmel il- Viżta Fraterna, u lill-Konferenza ta’ l-Assistenti Ġenerali biex tibgħat id-delegat tagħha biex jagħmel il- Viżta Pastorali.

IL-FRATERNITÀ LOKALI

Artiklu 9:

1. It-twaqqif kanoniku ta’ Fraternitajiet Lokali ġodda jsir skond ma jiġi preskritt fil-Kostituzzjonijiet Ġenerali, artikli 46-48.

2. Jekk xi Fraternità Lokali, għal raġunijiet validi, trid tgħaddi għall-assistenza pastorali ta’ familja religjuża oħra ta’ l-I Ordni Franġiskan, għandha tagħmel talba uffiċjali lill-Eżekuttiv Nazzjonali. Il-Ministru Nazzjonali imbagħad jikkuntattja lis-Superjuri Maġġuri rispettivi. Il-permess li Fraternità tgħaddi għall-kura pastorali ta’ ubbidjenza religjuża Franġiskana oħra torbot lill-Fraternità Lokali li ma titlobx trasferiment ieħor għal perjodu ta’ almenu sitt snin (KK.ĠĠ. 47§2).

3. Il-Kunsill tal-Fraternità Lokali hu magħmul skond dak li jingħad fil-Kostituzzjonijiet Ġenerali, Artiklu 49§2. L-uffiċjali eletti huma l-Ministru, Viċi Ministru, Segretarju u Ekonomu. Jistgħu jiġu eletti mhux aktar minn tliet kunsillieri, li jkollhom dmirijiet partikulari, u skond in-numru ta’ Franġiskani Sekulari professi fil-Fraternità. Wieħed minnhom hu responsabbli għall-Formazzjoni Inizjali u Permanenti. L-elezzjonijiet kanoniċi għandhom isiru skond ma jingħad fil-Kostituzzjonijiet Ġenerali, artikli 76-80. L-Eżekuttiv Nazzjonali jaħtar il-President u l-Assistent xhud tal-Kapitli elettivi tal-Fraternità Lokali.

4. Id-dmirijiet tal-Ministru u l-Kunsill huma indikati fil-KK.ĠĠ. 50-52. Il-fraternità Lokali trid iżżomm arkivju li fih jitqiegħed f’ordni l-materjal ta’ dokumentazzjoni. Is­Segretarju, jew xi membru ieħor tal-Fraternità, jikteb il-kronaka, u fiha jniżżel il-ġrajjiet ewlenin tal-Fraternità. L-Ekonomu, flimkien mal-Ministru, jamministra l-flus tal-Fratemità u jippreżenta rapport annwali kif ukoll budget. Il-kontijiet tal-bank għandhom jiġu iffirmati mill-Ministru u mill-Ekonomu bħala prokuraturi “pro tempore”.

5. It-trasferiment għal Fraternità oħra, il-ħruġ, is-sospensjoni jew it-tkeċċija mill­Fraternità, jridu jsiru eżattament kif jiġi preskritt fil-KK.ĠĠ. 55-60.

6. Meta tinqala’ xi ħtieġa partikulari, xi sezzjoni mill-Fraternità Lokali li jkollha interessi komuni tista’ tikkostitwixxi grupp distint fi ħdan l-istess Fraternità, u torganizza laqgħat għaliha, bid-dmir li tibqa’ tieħu sehem b’mod sħiħ fil-laqgħat l-oħra kollha tal-Fraternità. Dawn il-gruppi jistgħu jkunu iffurmati għal membri aktar żgħażagħ jew ġodda, jew għal koppji miżżewġin fil-Fraternità (KK.ĠĠ. 34).

7. Membri tal- Kleru Djoċesan huma milqugħin li jissieħbu fil-Fraternitajiet Lokali, bil­kundizzjoni li jridu jieħdu sehem f’kors ta’ formazzjoni Franġiskana, ikunu motivati minn spirtu ġenwinament Franġiskan u jagħmlu l-mixja kollha ta’ formazzjoni inizjali. Huma għandhom id-dmir li jingħaqdu mal-Fraternità Lokali fil-laqgħat kollha tagħha, u jamministraw il-ħtiġijiet pastorali tal-membri tagħha, mingħajr konflitt ta’ interessi mal­ministeru ta’ l-Assistent (KK.ĠĠ. 35).

IL-FRATERNITÀ LOKALI:SPIRTU TA’ TALB U DEVOZZJONI

Artiklu 10. Irtiri:- Il-Fraternità Lokali torganizza irtir darbtejn fis-sena. Tista’ tingħaqad ma’ Fraternitajiet oħrajn għall-irtiri. L-irtir isir esperjenza ta’ Fraternità li tagħti widen għall­Kelma ta’ Alla u titlob flimkien. L-irtir ma għandux jieħu sura ta’ laqgħa ordinarja tal­Fraternità. Hu irrikmandat li jiġi iddedikat almenu jum sħiħ għall-irtir. Forom ġodda ta’ irtiri għal gruppi iżgħar fi ħdan il-Fraternità tajjeb li jsiru, bħalma huma “directed” u “guided retreats”, kapitli ta’ tiġdid, u esperjenzi tar-regola Franġiskana għall-eremitaġġi (KK.ĠĠ. 13§1).

Artiklu 11. L-Ewkaristija:- Il-Fraternità Lokali tgħix fi spirtu ta’ għaqda meta taqsam flimkien il-Kelma ta’ Alla u l-Ħobż tal-ħajja fiċ-ċelebrazzjoni ta’ l-Ewkaristija. Darba fix-xahar il-Fraternità Lokali tiltaqa’ għaċ-ċelebrazzjoni komuni ta’ l-Ewkaristija, “iċ-ċentru tal-hajja tal-Fraternità” (KK.ĠĠ. 14§2; 53§2).

Artiklu 12: Dimensjoni Penitenzjali:- Id-dimensjoni penitenzjali tal-ħajja Franġiskana Sekulari tidher l-aħjar fiċ­ċelebrazzjoni tas-Sagrament tar-Rikonċiljazzjoni fil-kuntest ta’ ċelebrazzjoni penitenzjali. Il-Fraternità Lokali hi mħeġġa li torganizza dawn iċ-ċelebrazzjonijiet l-aktar matul l-irtiri fl-Avvent u fir-Randan (KK.ĠĠ. 13§1).

Artiklu 13: Ministeru Liturġiku:- Il-Fraternità Lokali trid tħarreġ lill-membri tagħha biex jieħdu sehem attiv fl­animazzjoni liturġika waqt ċelebrazzjonijiet fil-kuntest tal-komunità lokali li tiltaqa’ fil­knejjes Franġiskani jew parrokkjali li magħhom hi marbuta l-Fraternità. Il-Franġiskani Sekulari huma mħeġġin jieħdu taħriġ professjonali biex isiru letturi, katekisti u ministri straordinarji ta’ l-Ewkaristija (KK.ĠĠ. 14§3).

Artiklu 14: Liturġija tas-Sigħat:- L-għaqda bejn il-Fraternità Lokali u l-aħwa ta’ l-I Ordni tidher l-aktar meta s­Sekulari jiġu fraternament milqugħin biex jieħdu sehem fiċ-ċelebrazzjoni komuni tal­Liturġija tas-Sigħat, bħala membri attivi tal-poplu ta’ Alla. Il-Liturġija tas-Sigħat għandha tingħata l-ewwel post waqt il-laqgħat tal-Fraternità. Għall-membri aktar anzjani u morda tal-Fraternità Lokali li jsibuha diffiċli jitolbu l-Liturġija tas-Sigħat, l-Uffiċċju tat-tnax-il Missierna jista’ jibqa’ jintuża bħala forma utli ta’ talb (KK.ĠĠ. 14§3).

Artiklu 15: Devozzjonijiet Franġiskani:- Il-Fraternità Lokali trid tkun taf liema huma l-forom Franġiskani ta’ talb popolari u tħeġġiġhom, mingħajr ma taqa’ f’devozzjonalizmu li m’għadux jappella għall-insara kontemporanji. Id-devozzjoni lejn il-Passjoni ta’ Kristu (il-Via Crucis) u d-devozzjoni lejn il-Verġni Marija (Kuruna Franġiskana) (KK.ĠĠ. 16), l-adorazzjoni ewkaristika u ċ­ċelebrazzjonijiet komuni tal-Kelma ta’ Alla, b’taħriġ fil-meditazzjoni personali jew “lectio divina”, jistgħu jkunu ta’ għajnuna kbira biex jiġu iċċelebrati l-misteri kbar tal-fidi tagħna (KK.ĠĠ. 9; 14§5).

Artiklu 16: Talb għall-Aħwa Mejtin:-Il-Fraternità Lokali għandha d-dmir li titlob għall-aħwa li laqgħu lil “oħtna l-mewt tal-ġisem” fi spirtu Franġiskan. Il-Franġiskani Sekulari għandhom jiġu avżati mill-Ministru tagħhom u jieħdu sehem fl-Ewkaristija tal-funerali ta’ ħuthom, kif ukoll ta’ l-Assistenti u s­Superjuri Maġġuri ta’ l-I Ordni Franġiskan. Għandhom ukoll jiċċelebraw il-Liturġija tas­Sigħat jew xi forom oħrajn ta’ talb. Matul ix-xahar ta’ Novembru l-Fraternità għandha titlob b’mod speċjali għall-membri tagħha mejtin.

IL-FRATERNITÀ LOKALI:

MISSJONI TA’ EVANĠELIZZAZZJONI FIL-KNISJA U FID-DINJA

Artiklu 17. Għamliet ta’ Apostolat

1. Il-Fraternità Lokali hi l-ambjent fejn il-Franġiskani Sekulari jiġu evanġelizzati u minn fejn huma jevanġelizzaw. Is-Sekulari huma evanġelizzati fl-ispirtu tal-bejatitudni billi jagħtu widen għall-Kelma ta’ Alla, u b’qari intelliġenti tas-sinjali taż-żminijiet preżenti fil­Knisja u fis-soċjetà.

2. Il-missjoni ta’ evanġelizzazzjoni tal-Fraternità tista’ tinfirex f’diversi oqsma ta’ apostolat: gruppi ta’ familji, gruppi ta’ katekeżi u talb, ħidma soċjali fost l-anzjani, persuni p’diżabilità jew morda, impenn favur il-paċi, ġustizzja u l-integrità tal-ħolqien (KK.ĠĠ. 18).

3. Kull Fraternità tista’ tħabrek biex tispeċjalizza f’xi tip ta’ apostolat li jaqbel mal-­ħtiġijiet ta’ l-ambjent lokali li fih taħdem. Dak li jgħodd mhuwiex x’kapaċi tagħmel il­Fraternità, imma l-ispirtu Franġiskan ta’ minorità li għandu jimla l-ħidma apostolika tagħha (KK.ĠĠ. 19).

Artiklu 18. Inseriti fis-Soċjetà:- Il-Franġiskani Sekulari li għandhom responsabiltajiet soċjali jew politiċi għandhom jagħrfu l-importanza tal-missjoni evangelizzatriċi tagħhom fis-soċjetà. Fil-fatt, dawk il­Franġiskani Sekulari kwalifikati huma mħeġġin jieħdu parti attiva fil-qasam soċjali, f’oqsma bħalma huma l-kultura, l-edukazzjoni, unions tal-ħaddiema u l-kunsilli lokali tal-bliet u rħula (KK.ĠĠ. 20-22).

Artiklu 19. Mistrieħ u Rikrejazzjoni:- Il-Fraternità lokali għandha tipprovdi mezzi għar-rikrejazzjoni tal-membri tagħha, b’mod li jħossuhom ferħanin li jkunu flimkien f’mumenti ta’ mistrieħ. Xi laqgħat tal-Fraternità għandhom jigu diretti lejn dan l-iskop (KK.ĠĠ. 2l§2).

Artiklu 20. Non-vjolenza:- Il-Franġiskani Sekulari għandhom jagħtu xhieda li huma persuni li jħobbu l-paċi. Huma għandhom jibqgħu fidili mat-tradizzjoni tagħhom li jiċħdu għal kull għamla ta’ vjolenza, u li ma jġorrux armi. Il-Kunsill tal-Fraternità għandu jfakkar lill-aħwa kollha dwar id-qmir li jagħmlu testment fi żmien tajjeb, mingħajr ma jindaħal fil-mod kif huma jiddisponu minn ġidhom (KK.ĠĠ. 23).

Artiklu 21. Il-Koppji Miżżewġin:- Il-koppji miżżewġin huma don uniku għall-Fraternità. L-esperjenza tagħhom tal­ħajja miżżewga fi Kristu tinqasam mal-Fraternità. Huma “joħolqu kundizzjonijiet tajba għal djalogu bejn ġenerazzjoni u oħra”, b’tali mod li jipprovdu l-mezzi biex iżommu kuntatt u janimaw il-moviment taż-Żgħażagħ Franġiskani. F’kull Fraternità, il-koppji miżżewġin jistgħu wkoll jiltaqgħu flimkien bħala gruppi distinti minħabba l-formazzjoni nisranija tagħhom fl-istat ta’ miżżewġin, imħares dak li jgħid l-Art. 9§6. Hu d-dmir tal-membri miżżewġin tal-Fraternità li jorganizzaw il-moviment tat-Tfal Franġiskani skond l­indikazzjonijiet mogħtija mill-gvern ġenerali ta’ l-Ordni (KK.ĠĠ. 24-25).

Artiklu 22. Aħwa Anzjani u Morda:- Il-Fraternità Lokali għandha d-dmir li tiddelega xi wħud mill-membri tagħha biex regolarment iżuru u jieħdu kura partikulari tal-membri anzjani u morda li jinsabu fi djarhom jew fi djar għall-anzjani, kif ukoll li jwasslulhom l-aħbarijiet dwar il-laqgħat tal-Fraternità. Dawn il-membri għandhom id-dritt li jigu ipprovduti bl-għajnuna morali u materjali li għandhom bżonn mill-membri l-oħrajn tal-Fraternità, filwaqt li joffru t-tbatijiet tagħhom bħala s-sehem tagħhom fil-missjoni evanġelizzatriċi ta’ l-aħwa (KK.ĠĠ. 26-27).

IL-FRATERNITÀ LOKALI:IL-FORMAZZJONI

Artiklu 23. Pjan ta’ Formazzjoni:- L-Eżekuttiv Nazzjonali għandu d-dmir li jipprovdi pjan ta’ formazzjoni lill­Fraternitajiet Lokali kollha. Dan għandu jsir fi qbil mal-pjan ta’ formazzjoni ta’ l-OFS, u jinbena fuq id-dimensjonijiet umani, insara u Franġiskani (KK. ĠĠ. 37).

Artiklu 24. Promozzjoni VokazzjonaliIl-Fraternità Lokali, jekk trid tibni l-futur tagħha, trid tieħu b’serjetà kbira l-ħidma li ssib vokazzjonijiet għall-OFS. Din ir-responsabiltà taqa’ speċjalment fuq il-Ministru u d­Direttur tal-Formazzjoni, li jifformulaw kriterji għal dixxerniment vokazzjonali, filwaqt li jieħdu kura partikulari għall-maturità, moħħ miftuħ u entużjażmu tal-kandidat biex jaħdem flimkien ma’ ħaddieħor (KK.ĠĠ. 38§1; 45).

Artklu 25. L-ewwel kuntatt ma’ l-OFS

1. Il-perjodu ta’ l-ewwel kuntatt ma’ l-OFS idum ta’ l-inqas sitt xhur. Jista’ jibda b’ċerimonja sempliċi ta’ laqgħa fi ħdan il-Fraternità. Matul dan il-perjodu l-kandidat jidħol f’kuntatt mal-Fraternità li tilqgħu, jiġi mistieden għal-laqgħa ta’ kull xahar, u jivverifika l­vokazzjoni bl-għajnuna tad-Direttur tal-Formazzjoni (KK.ĠĠ. 38§2).

2. Id-deċiżjoni li jiġu milqugħin membri ġodda fil-Fraternità taqa’ fuq il-Kunsill tal­Fraternità Lokali flimkien mal-Ministru. L-opinjoni tad-Direttur tal-Formazzjoni trid tingħata importanza meta wieħed idaħħal membri ġodda (KK.ĠĠ. 38§3).

Artiklu. 26. Rekwiżiti għad-Dħul

1. Jekk kandidat jitlob li jidħol fi Fraternità Lokali għandu jkollu almenu 18-il sena, u jrid jagħti t-talba tiegħu bil-miktub lill-Ministru responsabbli għal dik il-Fraternità. Ir­rekwiżiti għad-Dħul li huma deskritti fil-KK.ĠĠ. 39 għandhom jiġu mħarsa b’attenzjoni kbira.

2. Hu importanti li persuna li titlob li tidħol fl-OFS tirċievi għarfien bażiku tal-kariżma Franġiskan. Il-Kors ta’ Studji Franġiskani hu speċifikament ippjanat biex jaqdi dan l-iskop. Il-Ministru u l-Kunsill tal-Fraternità Lokali jridu jiżguraw ruħhom li ma jaċċettawx membri ġodda li ma rċevewx preparazzjoni bażika fil-kariżma Franġiskan almenu għal sitt xhur qabel id-dħul tagħhom fil-Fraternità.

Artiklu 27. Formazzjoni qabel il-Professjoni

1. Ir-rit tad-dħul jiġi ċċelebrat skond ir-Ritwal. Il-perjodu ta’ formazzjoni tal-bidu jdum għal sentejn, b’tali mod li jiżgura tweġiba matura għall-vokazzjoni qabel ma ssir il professjoni (KK.ĠĠ. 40§ 1).

2. Il-perjodu ta’ formazzjoni tal-bidu għandu l-iskop li jifforma lill-Franġiskani Sekulari fl-Iskrittura Mqaddsa, fil-kitbiet u l-ispiritwalità ta’ San Franġisk, u l-aktar fl­istudju tar-Regola u l-Kostituzzjonijiet, kif ukoll fl-istorja ta’ l-OFS u fil-missjoni ta’ evangelizzazzjoni tiegħu fid-dinja llum (KK.ĠĠ. 40§2).

3. Matul il-perjodu ta’ formazzjoni tal-bidu s-Sekulari huma mistiedna għal-laqgħa u l­Ewkaristija tal-Fraternità, kif ukoll għall-irtiri. Ruma obbligati ukoll biex isegwu l-laqgħat regolari mad-Direttur tal-Formazzjoni. Jekk in-numru ta’ persuni fil-formazzjoni inizjali mhuwiex għoli, diversi Fraternitajiet Lokali jistgħu jorganizzaw laqgħat formattivi flimkien. Għandhom ukoll jiehdu parti attiva fil-missjoni ta’ evangelizzazzjoni tal­Fraternità. (KK.ĠĠ. 40§3).

Artiklu 28. Il-Professjoni

1. L-ammissjoni għall-Professjoni wara l-formazzjoni tal-bidu ssir skond ma hu mitlub fil-KK.ĠĠ. 41. Il-kandidat għall-professjoni jippreżenta talba bil-miktub lill-Ministru Lokali. Il-Kunsill tal-Fraternità flimkien mal-Ministru jiddeċiedu dwar li jaċċettaw kandidat għall-professjoni permezz ta’ vot sigriet. L-età minima għall-professjoni fil-­Fraternitajiet Lokali hi ta’ 23 sena, imħares dak li jgħid il-paragrafu 4 ta’ din it-taqsima.

2. Is-sinjal distintiv ta’ sħubija fl-Ordni hu t-TAU Franġiskan. Hu projbit f’kull żmien li wieħed juża sinjali distintivi oħrajn, bħalma huma l-iskapular, kurdun jew saħansitra l­libsa Franġiskana għax dawn huma sinjali tal-ħajja ikkonsagrata u mhux tas-sekulari (KK.ĠĠ. 4l§2; 43).

3. L-Ordni Franġiskan Sekular f’Malta jilqa’ b’mod sħiħ l-implikazzjonijiet tejoloġiċi tal-kelma “Professjoni”, filwaqt li jifimhom kif inhuma applikati għall-istat sekulari li fih il­-Franġiskani Sekulari jwiegħdu li jgħixu l-Evanġelju ta’ Ġesù Kristu fl-ispirtu tal-bejatitudni (KK.ĠĠ. 15§1).

4. Il-kandidati li jidħlu qabel ikollhom 21 sena jagħmlu l-Professjoni temporanja tar­Regola OFS fuq bażi annwali għal perjodu ta’ tliet snin, kull darba wara li jingħata l­gudizzju pożittiv tal-Kunsill tal-Fraternità. Fit-tielet sena tal-Professjoni temporanja, jew malli l-kandidat ikollu 23 sena, hu jagħmel il-Professjoni definittiva (KK.ĠĠ. 42§2).

5. Il-Professjoni hi att pubbliku li jorbot lill-kandidat mal-Fraternità. Dan l-att jitlob mill-kandidat l-għarfien dwar ir-responsabiltà tiegħu lejn l-għaqda sħiħa tal-Fraternitajiet OFS fid-dinja kollha. B’mod konkret dan jitlob minnu preżenza personali, xhieda fit-talb u fil-kollaborazzjoni attiva skond il-possibilità ta’ kull wieħed fl-animazzjoni tal-Fraternità proprja, u l-kontribut materjali lejn l-attivitajiet tal-Fraternità OFS fil-livelli kollha tagħha (KK.ĠĠ. 30).

Artiklu 29. Formazzjoni Permanenti:- Il-formazzjoni permanenti tal-Franġiskani Sekulari hi wkoll responsabiltà serja tal­Kunsill tal-Fraternità Lokali. Hu essenzjali li kull Fraternità Lokali jkollha librerija ta’ riferenza bażika ta’ kotba Franġiskani u dokumenti reċenti tal-Knisja u tal-moviment Franġiskan in ġenerali. L-Eżekuttiv Nazzjonali irid jieħu Hsieb jorganizza seminars, ġranet ta’ studju, jew korsijiet għall-Franġiskani Sekulari kollha. Jieħu ħsieb ukoll jippubblika gazzetta ta’ aħbarijiet dwar l-OFS u jqassamha lill-Fraternitajiet kollha, biex hekk joħloq spirtu ta’ għaqda bejniethom. L-aċċess għall-“SFO web-site” fuq l-Internet u għal CIOFS­List hu għajnuna kbira għall-formazzjoni kontinwa tal-Fraternitajiet Franġiskani Sekulari

ASSISTENZA SPIRITWALI

Artiklu 30
1. L-Unjoni tal-Ministri Provinċjali ta’ l-I Ordni Franġiskan f’Malta (OFM, OFM Conv, OFM Cap) hi inkarigata mill-”altius moderamen” rigward il-fedeltà ta’ l-OFS lejn il-kariżma Franġiskan (Codex Iuris Canonici, can. 303). Hi kompetenza tagħhom li jwaqqfu Fraternitajiet ġodda fejn hemm kunventi Franġiskani, li jagħmlu l-Viżta Pastorali u li jipprovdu Assistenti “xierqa u mħejjija tajjeb” lill-Fraternitajiet (KK.ĠĠ. 85-86,88).
2. Il-Kunsill tal-Fraternità Lokali jitlob Assistent Spiritwali, li għandu jkun religjuż Franġiskan minn dik il-Familja ta’ l-I Ordni li tassumi responsabiltà għall-assistenza ta’ dik il-Fraternità partikulari. Is-Superjur Maġġuri jintalab li jqis it-talba tal-Kunsill tal-Fraternità Lokali, li jindika ismijiet ta’ aħwa li huma meqjusin li jkunu Assistenti Spiritwali kompetenti (KK.ĠĠ. 89§2; 9l§1 u Statuti għall-Assistenza Pastorali OFS 7§1 [minn issa ’l quddiem SPA]).
3. L-Assistenti Nazzjonali jinħatru mis-Superjuri Magguri rispettivi tagħhom, wara li dawn ikunu semgħu l-Eżekuttiv Nazzjonali. L-Assistenti Nazzjonali ta’ Malta jikkostitwixxu Konferenza ta’ Assistenti Nazzjonali OFS, magħmula minn tliet aħwa, wieħed minn kull familja Franġiskana ta’ l-I Ordni preżenti f’Malta, li wieħed minnhom ikun president u l-ieħor segretarju fuq bażi ta’ rotazzjoni kull tliet snin (KK.ĠĠ. 90§3; SPA 27; 40).
4. Id-dmirijiet ta’ l-Assistent Spiritwali huma:
a. Li jġib ‘il quddiem il-għaqda mal-Knisja;
b. Li jagħti xhieda ta’ l-għaqda li teżisti bejn l-OFS u l-aħwa Franġiskani;
c. Li jikkopera fil-formazzjoni inizjali u kontinwa ta’ l-aħwa fl-OFS;
d. Li jagħti servizz pastorali, liturġiku u sagramentali lill-Fraternità (SPA 3).

5. Dawk il-Fraternitajiet li huma mwaqqfin fil-knejjes u djar Franġiskani għandhom jaħdmu biex iżommu spirtu ta’ għaqda u kollaborazzjoni mal-patrijiet. Il-gwardjani u l-fraternitajiet ta’ l-aħwa għandhom jiftakru dwar l-importanza tal-Fraternità Franġiskana Sekulari bħala parti essenzjali mill-Familja Franġiskana, bi drittijiet u dmirijiet rikonoxxuti (KK.ĠĠ. 90§5).
6. F’każi li fihom ma jkunx hemm Assistenti Spiritwali kompetenti għall-Fraternitajiet kollha, jew meta Assistent wieħed irid ilaħħaq ma’ diversi Fraternitajiet, il-Kunsill tal-Fraternità Lokali jista’ jiġi assistit minn Animatur. Biex wieħed isir Animatur, wieħed irid ikun Franġiskan Sekular profess għal perjodu ta’ almenu ħames snin, jew ukoll reliġjuża minn xi waħda mill-Kongregazzjonijiet Femmili Franġiskani preżenti f’Malta, u jirċievi taħriġ espert permezz ta’ korsijiet li huma speċifikament mogħtija għal dan il-għan. L-Animaturi jiġu indikati mill-Eżekuttiv Nazzjonali u jinħatru mis-Superjur Maġġuri kompetenti ta’ l-I Ordni. Huma jiffurmaw parti mill-Kunsill tal-Fraternità Lokali bi dritt ta’ vot. (KK.ĠĠ. 9l§3; SPA 8).

VIŻTA FRATERNA U VIŻTA PASTORALI

Artiklu 31
1. Il-Ministru Nazzjonali, bl-approvazzjoni tal-Kunsill Nazzjonali, jitlob il-Viżta Fraterna mill-Ministru Ġeneral jew delegat darba kull tliet snin. Il-Ministru, Nazzjonali, jew il-persuna delegata, jagħmel il- Viżta Fraterna darba kull sena u nofs lill-Fraternitajiet Lokali kollha. Programm tal-Viżta Fraterna għandu jintbagħat lill-Fraternitajiet kollha. Il¬Viżitatur ma jistax ikun membru tal-Fratemità li se jżur (KK. ĠĠ. 93).
2. Il-Ministru Nazzjonali, bl-approvazzjoni tal-Kunsill Nazzjonali, jitlob il-Viżta Pastorali tal-Fraternità Nazzjonali darba kull tliet snin mill-Konferenza ta’ l-Assistenti Ġenerali. Jitlob ukoll mill-Unjoni tal-Ministri Provinċjali ta’ l-I Ordni Franġiskan l-Viżta Pastorali lill-Fraternitajiet Lokali (KK.ĠĠ. 94).
3. Fil-Viżti Fraterni lill-Fraternitajiet Lokali jew lill-Fraternità Nazzjonali, il-Viżitatur irid jingħata r-reġistri u l-atti tal-Kunsilli rispettivi biex jeżaminahom. Dawn iridu jinkludu d-dokumentazzjoni relattiva għall-elezzjonijiet tal-Kunsilli, il-minuti tal-laqgħat tal-Fraternità u l-Kunsill, il-pjan tal- formazzjoni, u l-amministrazzjoni finanzjarja tal-Fraternità. Il-Viżitatur imbagħad jikteb relazzjoni dwar il-Viżta tiegħu.
4. Fil-Viżti Pastorali lill-Fraternitajiet Lokali jew lill-Fraternità Nazzjonali, il-Viżitatur għandu jeżamina r-reġistri ta’ ammissjonijiet u professjonijiet, il-ħajja tat-talb tal-Fraternità u l-mod kif l-Assistent Spiritwali jew Animatur qed jaqdi dmiru.
5. Fil-każ tal-Viżti Fraterni u Pastorali lill-Fraternitajiet Lokali, tista’ ssir laqgħa bejn il-Viżitatur u l-Gwardjan tad-dar Franġiskana li magħha hi annessa l-Fraternità. Fil-każ tal¬Viżti Fraterni u Pastorali lill-Fraternità Nazzjonali, tista’ ssir laqgħa bejn il-viżitatur u l¬Ministri Ptovinċjali tal-Familji Franġiskani ta’ l-I Ordni.
6. Kull meta membru tal-CIOFS jagħmel Viżta Fraterna, il-Kunsll Nazzjonali għandu joffri li jħallas l-ispejjeż kollha relattivi għall-vjaġġ bl-ajru u spejjeż oħrajn ta’ vjaġġi, kif ukoll jaħseb għall-”full board lodging” tal-Viżitatur. Kull meta Assistent Ġenerali jagħmel Viżta Pastorali, l-ispejjeż kollha relattivi għall-vjaġġi u l-permanenza tiegħu jitħallsu mill-Provinċja tal-Familja Franġiskana ta’ l-I Ordni li tagħha ikun membru l-Viżitatur.

RELAZZJONI MAŻ-ŻGĦAŻAGĦ FRANĠISKANI

Artiklu 32
1. Iż-Żgħażagħ Franġiskani (GIFRA) huma awtonomi mill-Ordni Franġiskan Sekular. Fl-istess ħin, iżda, huma jaqsmu l-istess ispirazzjoni komuni Franġiskana. Għal din ir-raġuni għandhom jinżammu relazzjonijiet tajbin bejn l-OFS u l-GIFRA (KK.ĠĠ. 96-97).
2. Il-Fraternitajiet Nazzjonali u Lokali għandhom iħeġġu inizjattivi komuni maż-Żgħazagħ Franġiskani, filwaqt li jirrispettaw il-karattru awtonomu tal-GIFRA. Huma għandhom jieħdu sehem kull meta ż-Żgħażagħ Franġiskani jagħmlu l-wegħda tagħhom. Hu irrikmandat li l-Fratemità taħtar xi membri aktar żgħażagħ fl-età biex iżommu kuntatt mal¬GIFRA u jorganizzaw laqgħat li fihom iż-Żgħażagħ Franġiskani jesprimu l-identità Franġiskana komuni b’modi li jappellaw għalihom. Delegat Franġiskan Sekular jinħatar biex jagħmel parti mill-Kunsill Nazzjonali GIFRA. Jixraq li jiġi elett delegat GIFRA profess fl-OFS biex jgħamel parti mill-Kunsill Nazzjonali OFS.

KOMUNJONI MAL-FAMILJA FRANĠISKANA
U MAL-KNISJA

Artiklu 33
1. Il-Franġiskani Sekulari għandhom jaħdmu biex juru spirtu ġenwin ta’ għaqda bejniethom u mal-Familja Franġiskana, billi jieħdu sehem fiċ-ċelebrazzjonijiet komuni mal¬patrijiet ta’ l-I Ordni, mas-Sorijiet Klarissi, mal-Kongregazzjonijiet Franġiskani femminili u ma’ Istituti Sekulari Franġiskani (KK.ĠĠ. 98).
2. L-Eżekuttiv Nazzjonali jibgħat relazzjoni annwali fuq l-Ordni Franġiskan Sekular lid-Delegat għal-Lajċi tal-Konferenza Episkopali ta’ Malta, u jiżgura li d-dettalji korretti rigward l-OFS jitniżżlu fid-direttorji annwali tad-djoċesijiet ta’ Malta u Għawdex (KK.ĠĠ. 99-100).

INTERPRETAZZJONI U EMENDI
GĦALL-ISTATUTl NAZZJONALI

Artiklu 34
Dawn l-Istatuti jistgħu jiġu emendati b’maġġoranza ta’ żewġ terzi tal-membri preżenti waqt il-Kapitlu Nazzjonali Elettiv. L-Emendi huma suġġetti għal approvazzjoni mill-CIOFS. L-interpretazzjoni ta’ l-Istatuti hi l-kompetenza tal-CIOFS. Irid isir rikors f’Ruma kull darba li tinqala’ diffikultà fl-interpretazzioni ta’ l-Istatuti.

Kunsill Ġdid fil-Fraternita tal-Hamrun

L-Elezzjoni saret nhar il-Erbgha 17 ta' Gunju 2009 fil-Fraternita' tal-Hamrun fejn kien hemm preżenti wkoll l-Assistent Nazzjonali Patri Martin Coleiro OFM. Il-Kunsill il-ġdid ġie ffurmat hekk :

Ministru Emanuel Muscat,

Vici Ministru Lina Muscat,

Segretarju Emanuel Mallia,
Kaxxiera Franca Zammit

Membri:- Joyce Zammit, Doris Naudi u Raymond Zammit.

Hekk kif jiltaqa' l-ewwel darba dan il-Kunsill jahtru l-persuna responsabbli ghall-Formazzjoni.

Nawguraw lill-Kunsill il-ġdid li jkompli jaħdem biex tisaħħaħ l-Ordni Franġisċan Sekular f'Malta

Ittra tal-Ministru Generali Encarnation del Pozo

Prot. No.2019/09
Circ. 08/09-14

Ruma 12 ta’ Marzu 2009
Il-Beata Angela Salawa
Verġni Franġiskana Sekulara mill-Polonja

Lill-Kunsillieri Internazzjonali
Ministri Nazzjonali ta’ Fraternitajiet Ikkostitwiti
U dawk responsabbli mill-Fraternitajiet Emerġenti


PAĊI U ĠID

Għeżież Aħwa, Rġiel u Nisa,

F’dan iż-żmien tar-Randan nixtieq nagħtikom merħba billi nitlob l-barka tal-Mulej għal xogħolkom, il-familji tagħkom u l-fraternitajiet tagħkom.

Fil-sitwazzjoni preżenti, tal-Presidenza taċ-CIOFS li għandha kont tal-Bank speċjali u separat għall-akkwist ta’ kwartieri u bħala riżultat tat-tiġidid riċenti tal-Istatuti tal-Fraternita’ Internazzjonali approvati fl-aħħar Kapitlu Ġenerali f’Novembru 2008 fl-Ungerija, aħna għandna nfakkru lill-fraternitajiet kostitwiti w emerġenti għall-obligazzjonijiet tagħhom fl-2009 biex iħallsu l-kontributi stabbiliti sabiex l-Ordni jkun jista’ jaħdem u jopera b’mod adekwat.

Huwa anke aktar importanti w urġenti li jiġġeded u li jiġi kkonfermat n-numru tal-membri ta’ kull Fraternita sabiex il-Kummissjoni Finanzjali tkun tista’ tippreżenta lill-Presidenza proposta li tindika il-kontribuzzjonijiet li se jitħallsu fil-perjodu 2010 - 2012. Is-serjeta u l-attenzjoni li bihom tkun mwettqa dan l-stħarriġ u tiġdid ikun sinjal tas-sens ta’ appartenenza lejn l-Ordni minn kull wieħed u waħda minnkom. F’ċerti pajjiżi n-numru tal-membri rrapurtat liċ-CIOFS huwa aktar baxx minn dak li huwa fil-fatt, f’każi oħrajn huwa ogħla ; irridu, għalhekk, nistabillixxu bil-ġustizzja u l-preċiżjoni eżatt kemm u x’tista’ kull Fraternita u għandha tħallas, bla ma titraskura l-possibilitajiet u r-realtajiet ta’ kull waħda minnhom. It-tagħrif (data) li tirċivi l-Kummissjoni Ekonomika tkun moghtija lill-persuna nkarigata mir-Report Annwali ; in-numru tal-membri rrapurtati se jibqa’ l-istess għall-kontribuzzjonijiet relevanti għall-perjodu 2010 sa 2012.

Mehmuż issibu rapport bil-figuri li għandna fil-preżent tal-membri ta’ kull Fraternita Nazzjonali u s-sitwazzjoni għall-periodu 2006-2009. (Encl. 1) ; ġentilment insaqsukom biex b’mod urġenti tikkonfermaw jew timmodifikaw dan in-numru. Nifhmu d-diffikultajiet li jeżistu fil-komunikazzjoni, imma din hija prijorita li hija meħtieġa biex jitwettaq ix-xogħol bit-trasparenza meħtieġa.

Dependenti fuq il-kollaborazzjoni prezzjuża tagħkom u s-sens ta’ responsabbilta ġentilment nistaqsukom biex twieġebu fir-rigward ta’ x’inhu n-numru tal-membri fil-fraternita tagħkom mhux aktar tard mit-30 ta’ Ġunju 2009 u sabiex tibgħatu l-kontribuzzjonijiet dovuti għal din is-sena kemm jista jkun malajr.

Qed nibgħatulkom l-istruzzjonijiet tal-bank mġedda sabiex tiddepożitaw l-kontribuzzjonijiet tagħkom, li ġa kienu kkunsinjati lill-parteċipanti fil-Kapitlu Ġenerali li għadda (Encl. 2)

Il-Mulej ibirikkom għall-isforzi kollha tagħkom, immirati wkoll lejn l-għan u t-tkabbir u d-dehra tal-Ordni, sabiex tkun dejjem iżjed fidila lejn l-Evanġelju u r-Regola tagħna, għall-akbar glorja tiegħu, f’din id-dinja fejn ix-xiehda tal-ħajja tagħna ta’ kuljum hija dejjem aktar meħtieġa.

Ħutkom b’tislijiet fraterni,


Encarnación del Pozo Maria Aparecida Crepaldi
Ministra generale Commissione economica

Mrs. Rose Brooks

Fid-9 ta’Marzu 2009, il–Mulej għoġbu jsejjaħ, biex jagħti l-mistrieħ ta’ dejjem, lil Rosy Brooks mill-Kalkara, li kienet membru attiv tal-Ordni Franġiskan Sekular. Rose issieħbet fl-Ordni, fi ħdan il-Fraternita' tal-Kalkara, fit-13 ta' Ottubru 1984 u, skond ir-records miżmuma, pprofessat fl-4 ta' Ottubru 1985. Kienet magħrufa u maħbuba ħafna għall-għajnuna li dejjem tat lill-Ordni u lill-knisja ta' Santa Barbara li tinsab mal-Kunvent ta' Santa Liberata.

Tul ħajjita b’dedikazjoni u ħafna mħabba tat ħafna mill-ħin tagħha tagħmel xogħol volontarju ta’ tindif fil-Knisja msemmija. Anki f’mumenti diffiċli dan ix-xogħol qatt m’abbandunatu. Kienet tħajjar nisa oħra jagħmlu dan kif ukoll tħeġġeġ lil uliedha biex jagħtu sehemhom ukoll.

Fil-festi, speċjalment ta’ San Franġisk u San Ġuda, bl-ikbar imħabba kienet, mill-bidu tal-ġimgħa, taħmi kull xorta ta’pasti li kienu jiġu apprezzati ħafna mill-kommunita’ kollha.

L-aħħar ħames snin ta’ ħajjitha ġiet wiċċ imb’wiċċ mat-tbatija, fejn kienet ta eżempju, speċjalment għal uliedha li dejjem daru biha. Uriethom li bis-sabar, dejjem hemm it-tama. Tathom x’jifhmu li quddiem it-tbatija dejjem trid tiggranfa mas-salib ta’ Sidna Ġesu’ Kristu, biex f’mumenti ta’qtigħ il-qalb u dubji, nersqu iktar lejh, u nindunaw kemm ikun qiegħed magħna. Meta niftħu qalbna għalih nindunaw li jkun firxilna tapit, u wittielna t-triq. Sakemm fl-aħħar nifhmu li fit-tbatija, l-Mulej ikun dejjem magħna, u dan nindunaw bih, meta nħossuna li rridu nibqgħu infaħħruh, u mhux induru kontra tiegħu. Rosy, f’mumenti fejn ġieli kienet f’waqtiet diffiċli, xorta kont taraha bil-kuruna f’idejha. Għalkemm ma kienx jinstema leħinha, xorta kont tara subajha iżebbġu l-kuruna, waħda wara l-oħra. Kull min mar iżura dejjem kien isibha bil-kuruna mdawra ma idejha.

Tul is-sena li għamlet l-isptar, jekk f’mumenti kont tara u taħseb li Rosy qiegħda fl-isbaħ raqda, hekk kif kont tgħidilha li ġie xi ħadd jaraha, immedjatament kienet tiftaħ għajnejha u tagħmel ħilitha kollha biex turi l-apprezament lil dawk li kienu jmorru jżuruha. B’mod speċjali, kif kienet tinduna bil-preżenza ta’saċerdot maġenba, kont tara l-movimenti ta’wiċċha jinbidlu bil-ferħ. Okkażjoni speċjali għaliha kienet meta L-Eċċelenza tiegħu, l-Isqof Pawlu Cremona żar l-isptar, u kif resaq lejn is-sodda tagħha, stajt tinduna bil-paċi li kienet qed tħoss ġewwa qalbha. Fl-aħħar ġranet, f’mumenti diffiċli ta’ ħajjitha, patri Franġiskan minn Għawdex, resaq lejha biex ikellimha. F’dak il-ħin ma kienx hemm tama li tiftaħ għajnejha, imma kif bintha qaltilha ‘Ma, hawn Patri ġie jarak’, għajnejha infetħu b’ċertu entużjażmu.

Fil-Funeral tagħha, li sar fil-Knisja Parrokkjali tal-Kalkara, barra il-familjari, attendew u kkonċelebraw Patrijiet mill-kommunita ta' Santa Liberata kif ukoll ħafna mill-membri tal-Fraternita' tal-Kalkara fejn kient maħbuba ħafna u nies mill-inħawi ta Santu r-Rokku fejn hi kienet mgħarufa sewwa.

Waqt li nitolbu għal din oħtna għażiża, nirringrazzjaw lil ħanin Alla ta’ kemm għinha fit-tbatija tagħha, u ta s-sabar lil uliedha. Nitolbuh iħenn għaliha, jagħtiha l-mistrieħ ta’dejjem u jdaħħalha fid-dawl tas-Sebħ tiegħu biex tgawdih fil-hena għal dejjem

Velja ta l-ahhar tas Sena

QUDDIEMEK, HAWN MIĠBURA

Velja fl-aħħar tas-sena

(Ċel.: Ċelebrant, Lett.: Lettur, Flim.: Flimkien)


Ċel. Fl-isem tal-Missier, u ta’ l-Iben, u ta’ l-Ispirtu s-Santu.
Flim. Amen.

Cel.: Għaddiet sena, sena oħra min ħajjitna u sena oħra fl-istorja tal-bniedem. Issa huwa l-ħin tar-rendikont, il-ħin biex fih infaħħru u nirringrazzjaw lil Mulej. Għaddejna min mumenti sbieħ u oħrajn ta’ niket, imma n-nisrani kollox hekk għandu jilqa’, b’mod sempliċi u meqjus. Iż-żmien li għadda huwa parti mill-istorja tagħna tant għal qalb il-Mulej Alla. Huwa jinsab magħna, dejjem.

Flim.: Hawn aħna quddiemek, Mulej, b’nifisna maqtugħ wara mixja hekk twila.
M’aħniex għajjena għaliex imxejna xi mili twal matul xi triq bla tmiem.
Għajjenin għaliex ħafna passi meddejnihom fuq triqatna, mhux fuq triqatek, Mulej.
Imxejna matul il-passaġġi mudlama ta’ l-egoiżmu tagħna mhux dawk imdawwla mill-parir siewi tal-kelma tiegħek.
Għax aktar afdajna fl-isforzi msieken tagħna li għajjewna, bla ma għarafna nintelqu fiduċjużi fil-ħniena tiegħek.

Ċel.: Hawn quddiem il-Mulej, ngħarfu n-nuqqasijiet tagħna li ċajpru u dalmu l-istorja tagħna ta’ din l-aħħar sena, speċjalment meta konna responsabbli tat-tbatija ta’ ħaddieħor u flimkien nitolbuh:
Mulej hniena.

Lett.: Nitolbuk maħfra Mulej ta’ kemm il-darba għixna u għaddejna ż-żmien tagħna bħalli kieku m’hemmx Alla
Flim.: Mulej ħniena.

Lett.: Nitolbuk maħfra ta’ kemm il-darba ma għixniex fl-imħabba bejnietna u ma lqgħajniex u ma ħfirniex lil- proxxmu
Flim.: Mulej ħniena.

Lett.: Nitolbuk maħfra tal-ħażen li xjentement għamilna matul din is-sena
Flim.: Mulej ħniena.

Lett.: Nitolbuk maħfra ta’ kemm il-darba ma għarafniex nfittxu l-paċi u nitbegħdu mill-ġlied ta’ bejnietna
Flim.: Mulej ħniena.

Lett.: Nitolbuk maħfra ta’ l-għebusija ta’ rasna u ta’ kemm il-darba mponejna l-għażliet tagħna fuq ħaddieħor
Flim.: Mulej ħniena.

Lett.: Nitolbuk maħfra tal-ġid kollu li stajna għamilna u ma għamilnix għax bżajna jew stajħna jew traskurajna.
Flim.: Mulej ħniena.

Ċel.: “Is-sena t-tajba!” Min hawn u ftit ieħor, fost tant briju, tibda sena oħra fl-istorja ta’ ħajjitna. Ilkoll nifirħu u nixtiequ lil xulxin sena mimlija ferħ, risq u paċi. Mhux li kieku kollna kemm aħna matul is-sena li dalwaqt tibda nħossu l-istessa ħeġġa li biha,f’dawn is-sigħat, nagħmlu u nirċievu l-awguri sbieħ. Żgur li kieku l-kawża tal-paċi fid-dinja tkun diġa nofsha mirbuħa.

Lett.: Ħa jasal malajr iż-żerniq ħalli nistqarru b’għemilna iktar milli bi kliemna li Ġesu’ Kristu huwa ħaj u jakkumpanjana fil-mixja tagħna f’din id-dinja!

Ċel.: Sena għodda spiċċat u oħra se tibda, u hawn aħna lesti biex bħala nsara ngħixu sena oħra fil-grazzja tal-Mulej. Nawguraw tant affarijiet sbieħ lil xulxin ... ejjew nawguraw lil xulxin li din is-sena ngħixuha tassew fil-grazzja tal-Mulej, li l-ħażen ma jaħkimx aktar fuqna u ma jħassarx iktar lill-ħajjitna. Ejjew nawguraw lil xulxin li l-Mulej isaltan fil-qlub tagħna.

Lett.: Il-Mulej hu l-qawwa tiegħi u t-tarka tiegħi, fih ittamat qalbi; ksibt l-għajnuna u ferħet qalbi; nroddlu ħajr bil-għana tiegħi. (Sal 28,7)

Flim.: Grazzi Mulej ta’ din is-sena li għoġbok tagħtina
Talli sejjaħtilna għal fidi li biha għanejtna
Għal-kisbiet u suċċessi li kellna, u anki għat-tbatijiet u ħsara li għaddejna minnhom, għaliex dawn il-mumenti għalmuna ngħollu l-ħsieb tagħna lejk.
Għal-hena ta’ dejjem li Inti wegħedtna,
għal persuni kkonsagrati li matul din is-sena ħadmu fl-għalqa tal-Mulej u għal ġid tagħna
u għal dawk ħutna madwar id-dinja kollha li bil-ħidma tagħhom irnexxilhom iwasslu mumenti ta’ ferħ lil bnedmin sħabhom.
Agħmel Mulej li nibdew is-sena ġdida bil-ferħ fi qlubna,
li nittieħdu mill-ezempju u l-imħabba tiegħek,
li bl-imġieba tagħna nfehmu lil ħutna x’esperjenza mill-isbaħ hija mixjietna miegħek.
Aħna żguri li s-sena l-ġdida, żmien futur mhux magħruf u esperjenzi li la huma mnissla lanqas miktuba,
hija rigal li Inti jogħoġbok tagħtina.
Aħna nagħmlu l-almu tagħna flimkien ma sħabna bnedmin ta’ rieda tajba sabiex dik li ġejja tkun l-isbaħ sena.
Miegħek u bl-għajnuna tiegħek, jirnexxilna, Mulej! Amen.

Cel.: Il-paċi hija rigal li titwieled meta qalbna tinfetaħ għal-għajn tal-vera ħajja. Li nagħtu l-paċi lil xulxin ifisser li bħal aħwa, aħna lesti naqsmu kollox, imma l-iktar id-don tal-fidi. Is-sinjal ta’ paċi li nagħtu lil xulxin huwa, mela, mpenn ta’ lejalta’ li bih nilqgħu lil ħutna bħala messaġġiera ta’ mħabba u maħfra.

Flim.: Mulej Ġesu’ Kristu, li għidt lill-Appostli tiegħek: inħallilkom is-sliem, nagħtikom is-sliem tiegħi, la tħarisx lejn dnubietna, izda ħares len il-fidi tal-Knisja tiegħek; agħtiha s-sliem u l-għaqda li Inti trid fiha. Inti li tgħix u ssaltan għal dejjem ta’ dejjem. Amen.

Ċel.: Il-paċi tal-Mulej tkun dejjem magħna llkoll .... nagħtu sinjal ta’ paċi lil xulxin.

Ċel.: O Missier l-aktar tajjeb u ħanin, ilqa’ t-talb tagħna f’dawn l-aħħar ħinijiet ta’ din is-sena u b’Ibnek Ġesu’ Kristu mexxina ‘l quddiem lejn il-futur li Inti ħejjejt għalina. O Missier, Alla u mħabba, Alla ħaj u veru, agħtina l-barka tiegħek biex mhux illum biss, izda f’kull mument ta’ ħajjitna, flimkien ma’ Marija Omm l-Iben tiegħek, nkunu nistgħu nkantawlek innijiet ta’ radd il-ħajr. Ferħana għaliex Inti tgħoddna bħala uliedek u żguri li Inti tismagħna, nitolbuk barka speċjali waqt li flimkien ngħidulek:

Flim.: Lilek, o Alla, infaħħru: lilek b’Mulej nistqaru
Lilek, Missier ta’ dejjem, id-dinja kollha tqimek.
Lilek l-anġli kollha,
lilek is-smewwiet u l-qawwiet kollha tagħhom,
lilek il-kerubini u s-serafini
ixandruk bla hena:
Qaddis, Qaddis, Qaddis
il-Mulej Alla ta’ l-eżerċti.
Is-smewwiet u l-art mimlija
bil-kobor tas-sebħ tiegħek.

Lilek tfaħħar il-ġemgħa ta’ l-Appostli.
Lilek ifaħħar l-għadd sabiħ tal-Profeti.
Lilek ifaħħru
il-qtajja’ tal-martri rebbieħa kollhom bjuda.

Mad-dinja kollha il-Knisja Mqaddsa tistqarr fik:
il-Missier, ta’ kobor bla qies
l-Iben tiegħek miqjum, veru u waħdieni
u l-Ispirtu s-Santu, id-Difensur.

Kristu, inti s-Sultan glorjuż.
Inti minn dejjem Bin il-Missier.
Int, biex teħles lill-bniedem,
ma stmerrejtx tinżel f’ġuf ta’ Verġni.
Int ħriġt rebbieħ fuq is-setgħa tal-mewt,
u ftaħt is-saltna tas-smewwiet għal min jemmen.

Int qiegħed fil-leminija ta’ Alla,
fis-sebħ tal-Missier.
Aħna nemmnu
li int għad terġa’ tiġi bħala mħallef.
Nitolbuk għalhekk li tgħin lill-qaddejja tiegħek,
li int fdejt b’demmek il-għażiż.
Agħmel li nissieħbu mal-qaddisin tiegħek
fil-glorja ta’ dejjem.

Salva lill-poplu tiegħek Mulej,
bierek il-wirt tiegħek.
Kun ir-ragħaj tagħhom,
erfagħhom għal dejjem.

Min jum għall-ieħor aħna nberkuk
u nfaħħru ismek għal dejjem,
u għal dejjem ta’ dejjem.
Agħmel, Mulej, li llum,
inħarsu ruħna minn kull dnub.

Ħenn għalina Mulej, ħenn għalina.
Ħa tkun fuqna Mulej it-tjieba tiegħek,
kif fik hi t-tama tagħna.
Fik, Mulej, jien nistkenn:
ma jkolli qatt għax ninfixel.
Cel.: Alla kollu mħabba, Sid ta’ kollox u ta’ kull żmien
Ibierek għemil idejna u ikattar il-ġranet tagħna fil-Paċi Tiegħu
Jisma’ t-talb tagħna
U iwassalna għal ferħ ta’ dejjem!

Flim. Amen.

Ms. Antonia Abdilla - ex Ministru

Il-Fraternita' tal-Kalkara tinsab f'luttu għall-mewt ta' waħda mill-għeżeż ex-ministri tagħha, is-Sinjorina Antonia Abdilla li mietet fl-Isptar Mater Dei nhar it-Tlieta 16 ta' Diċembru 2008 fl-eta ta' 91 sena.
Fil-ħajja Tonina kienet għalliema li bdiet il-karriera tagħha fl-aħħar gwerra dinija. Ġenerazzjonijiet ta' Kalkariżi tgħallmu taħtha u fil-Funeral kien hemm ħafna anzjani preżenti li tgħallmu fil-klassijiet tagħha. Sinjal ċar ta' kemm kienet apprezzata u maħbuba.

Membru għal żmien twil fl-OFS (Terzjarji kif kienu magħrufin dak iż-żmien) hi ħadmet fuq li ħadmet fil-Fraternita' tal-Kalkara flimkien ma Father Joe Garzia u Joe Pace. Kienet ministru tal-Fraternita' għal mill-inqas darbtejn u għal ħafna drabi bħala membru tal-Istess Kunsill. Tonina tat ukoll servizz regolari bħala kunsilliera fil-Kunsill Nazzjonali Kappuċċin tal-Ordni Franġiskan Sekular qabel ma saret l-għaqda. Barra min dan għal snin twal kienet kuljum tgħallem id-duttrina lit-tfal għall-preċett u għall-griżma fil-Kunvent ta' Santa Liberata.
Miss Abdilla kienet mara xipli, imma enerġika u taħdem ħafna. Kienet tispikka fiha l-umilta'. Figura ċentrali fost dawk li jmorru fil-Knisja ta' Santa Barbara, li qegħda mal-Kunvent ta' Santa Liberata, hi ġibdet ħafna nies lejn l-Ordni bl-eżempju ta' ħajjitha u bl-inkoraġġiment tagħha. Kienet vera Sekulara Franġiskana magħrufa u maħbuba min kulħadd speċjalment mill-membri kollha tal-Fraternita tal-Kalkara kif ukoll minn nies tal-inħawi.

Waqt li nitolbu għal din oħtna għażiża, aħna konvinti li l-Mulej ħenn għaliha, itiha dak li ħaqqha u jdaħħalha fid-dawl tas-Sebħ tiegħu biex tgawdih fil-hena għal dejjem.

.